August-2024

కైలాస గిరి సుందరా…
నా స్వామి…ఉజ్జయిని కాళేశ్వరా..
పుష్పార్చనలకే నీవు పరవశించేవు…
బిల్వ పత్రార్చనలకే నీవు సంతసించేవు…

అపరంజి బొమ్మవే పరమేశ్వరీ…
ఆదిపరాశక్తివే జగదీశ్వరీ….
మందార పువ్వువే మాహేశ్వరీ…
శివుని మది వనాన పూసేవు సర్వేశ్వరీ….

అలమేలు పతి అందమును చూడరే…
పద్మావతి విభుని ప్రాభవమును కానరే…
దివ్య మంగళ రూపాన దేదీప్యమానమై….
విశ్వమోహన రూపాన విలక్షణ దైవమై….

గణనాయకా తొలగించు విఘ్నాలను…
శుభదాయకా జరిపించు కార్యాలను…
వరదాయకా వారించు కష్టాలను…
జన్మ చరితార్థికా దీవించు నీ జనులను….

చూడరా కనులార సాంబశివుని…
ఉజ్జయిని లోనున్న కాళ లింగముని…
ఉత్తినే ఇచ్చు నట దీవెనలను..
నిన్ను బొత్తిగా అడగట ఏ సిరులను…

పెట్టరే కన్నయ్యకు వెన్న ముద్దలు…
తినిపించరే ప్రేమతో గోరుముద్దలు…
వెన్నంటే మిన్నంటిన ఇష్టమతనికి…
అది వుందంటే దొంగాటే ఆడు చివరికి…!! పెట్టరే!!

నారాయణీ…పుణ్య సాధ్వీమణీ…
మృదుభాషిణి…నిత్య సంతోషిణి..
ఏలవే మా తల్లి ఏడు లోకములు…
పాలించవే తల్లి పద్నాల్గు భువనాలు…

శంఖు నాద ప్రియునికి వందనాలు….
శంభు దేవునికి భక్తితో గంట నాదాలు…
వినిపించెదము వినయముతో విశ్వనాథునికి…
మనము తెలిపెదము మన వినతి పరమేశ్వరునికి…

శివనామస్మరణయే శ్రీరామరక్ష…
హరుని పారాయణ ప్రక్రియే సర్వ జగద్రక్ష…
స్మరియించిన జన్మలవును శివుని పాద సుమములు…
తనని ప్రార్థించిన మనసులవును హరునికి ఇష్ట భక్తులు….!!శివ!!

కలియుగ దైవమా…
కాళేశ్వర లింగమా…
పేర్లు వేరైన మీ దారులొకటే…
రూపు వేరైన మీ మనసులొకటే…