Author name: Surya Narayana

మంచుకొండల నడుమ మల్లికార్జునుడా…
చలికి ఎట్లున్నవో నీవు చంద్ర శేఖరుడా…
నిండు మనసు గల వాడ నిటాలక్షుడా…
నీ దయకు అంతెక్కడుందిరా ఆది శంకరుడా…

నాగేశ్వరం…నమో నాగేశ్వరం..
నాగ పంచమీ వైభవం అజరామరం…
చంద్రేశ్వరం… నాగ చంద్రేశ్వరం…
ఉజ్జయిని కాళునికి నాగ నీరాజనం…!!నాగే!!

ఉజ్జయినిలోనున్న ఓ మహాకాళా…
నన్ను సజ్జనుని చేయుమయా శ్రీ మహాకాళా…
శిప్రా నదీ తీరాన కొలువైన దేవా…
నీకు శిరసాభివందనములు ఓ మహాదేవా…

ఎదుగుచున్ననూ నేను వయసులో…
ఇంకనూ ఎదగ కుంటిని నేను భక్తిలో…
తలచుచున్ననూ నిన్ను ప్రతి క్షణములో….
శంకరా..పొందనైతిని చోటు నీ మనసులో….

అందుకో శంకరా.. అభివందనం…
శివా..పుచ్చుకో మా నుండి నీరాజనం…
చేసుకో మా మదిని సింహాసనం…
చేరి పోవయ్య వేసుకొని పద్మాసనం…

ధవళా చల దయాకరుడు కనికరించెరా….
అలా హిమాచలము నుండి ఇలకు కదలి వచ్చెరా….
కాంతులీను కనులతో….
ప్రసన్నమవ్వు నగవుతో..

తరలి రావా…బిల్వ దళ వనములెన్నైననూ…
శివా… కదలి రావా.. నీ పూజకు ఎచ్చోట వున్ననూ…
నీ సేవకే వెలిసింది మారేడు దళము…
అది నిను పూజించ మాకయ్యే దైవాంశ వృక్షము…

చాలయ్య శంకరా..చాలు చాలు…
ఈ ఒక జన్మ నాకింక చాలు చాలు…
వలదయ్య ఈశ్వరా.. వలదు వలదు…
మరుజన్మ నాకింక వలదు వలదు…

హే శంకరా…అడ్డ నామాలతో నీవు అలరారుచుంటివి…
ఆ నాగపడిగ బొట్టయ్యి ముదమవ్వుచుంటివి…
నాగరాజే నీకు కర్ణ కుండలమాయే…
తను చేయు పూజలే మాకు ఆదర్శమాయే…!! హే..శంకర!!

మేలి కనకపు ఛాయగల మాహేశ్వరా…
కలి మాయ ముసుగులను తొలగించ రావేమిరా….
నీలి మబ్బులను శాసించు శివ శంకర…
కర్మ కరిమబ్బుల నుండి మమ్ము తప్పించరా…