Author name: Surya Narayana

ఓమ్ నమ:శ్శివాయ నమ: ఏమాయరా శంకరా…మా వలన ఏ తప్పిదము జరిగిందయా హరహరా…చూస్తుంటే నీ కళ్ళ మిర మిరా చూపులను….కాళ్ళు కంపించిపోతుంటే నీముందు నేనెట్లు నిలవగలను….మన్నించరా శంకరా…ఏదేని తప్పుచేసుంటే  తండ్రిలా దండించరా శంకరా…!!ఏమా!! కాసింతైన దైవభక్తి లేని ఈ కాయము..కోరి వచ్చిందయా నీ సేవలో తరియించ పొంద నీ సాయము..ఎంచకయా శంకరా..తప్పొప్పులెన్నెన్ని వున్నా…కోపించకయా నీ పసిపాపలం శివన్నా.. !!ఏమా!! జాలి గుండె గల జంగమయ్యా…నీ కనులు ఎరుపెక్కితే చూడగలమా  చెప్పవయ్యా…ఉపసంహరించుకోవయ్య నీ ఉగ్రరూపాన్ని…మా కొసగుమయ్య నీ ప్రేమస్వరూప దర్శనాన్ని….!!ఏమా!! పాహిమాం..పాహిమాం..శివశంకరా…పాహిమాం..రక్షమాం..రక్షమాం..అభయంకరా రక్షమాం..

కనినంతనే క్షణమైన ఆగక కరములెత్తి మొక్కేను తనువు…
చల్లనీ మల్లన్నా…మల్లెమాలలకన్న, మధుపముల కన్న మధురమైనది చింతలను బాపు నీ సన్ననీ చిరునగవు…!!కని!!

ఎంతో శుభదినం…భీష్మ ఏకాదశీ పర్వదినం….
ఈ జన్మ పావనం…శివకేశవ స్వరూప సందర్శనం…
అనురాగ మూర్తులైన ఈ హరిహరులు….

ఎందుకయా శంకరా..అంతిష్టమవుతావు ప్రతి మనిషికీ…
ఏపేరు పెట్టము…మా మీద చూపిస్తున్న నీ కరుణకి…
శంభో మహాదేవ…శివశంకరా…

ఏమన్నదో వింటివా ముక్కంటి…నా హృదయము…
ఈ మదిని గుడి చేయమంటోంది శంకరా…నీకోసము..
వచ్చి ఉండిపోవయ్య మా గుండె గర్భగుడిలో….

చూడ రెండు కళ్ళూ చాలవు శివయ్య..నీ సౌందర్య రూపమును..
ముక్తి నొసగే ముక్కంటి…నీ అర్దనారీశ్వరమును…
మరల మరల రాని ఈ పుణ్య క్షణములు…

ఏదో…ఏదో…మాలోన తెలియని తీరనీ వెలితి…
తీర్చగ రావయ్య వేగిరముగ గిరిజా ప్రియపతీ…
విన్నవించుటెట్లనో తెలియకున్నది మాలోని…వేదన…

నాగభూషణా….నంది వాహనుడా..
దుష్ట నివారణా….భీమ శంకరుడా..
ఎన్నాళ్ళు వేచేమయా నీ దయకోసము…

నమో నమో దేవీ.. పరమేశ్వరీ..
శివహృదయ భాగతరుణీ…ప్రియ శాంకరీ…
కోరికొలుతుమమ్మా జగదీశ్వరీ…

మెరిసితివయ్యా శివయ్యా…
హరిద్రా వర్ణమున…
స్వాగతిస్తూ వాసంతమును వసంత పంచమిన…
ఋతువులిచ్చే నీకు చేయమా క్రతువులు….