Author name: Surya Narayana

ఏ పూర్వ పుణ్యమో నీ దర్శన భాగ్యము….
ఏ జన్మ ఫలమో నీ సేవా యోగ్యము…
కావాలి శంకరా…ప్రతిక్షణము నీ సాయము..
ఇవ్వాలి హర హరా కాదనక మాకభయము…!!ఏపూర్వ!!

ఉజ్జయిని పురవాస..శ్రీ కాళలింగేశా
కైలాసవాసా శ్రీ ఉమా మహేశా
కలిగించరా శంకరా నీ పైన ధ్యాస
ఏనాటికైనా కరుణించెదవని ఈ ప్రాణికొక చిన్న ఆశ..!!ఉజ్జ!!

ఏమాయెనో శంకరా ఈ తనువుకి..
నీ తలపులే చేరే గుండెలో ప్రతి మూలకి…
ఎద నీ గుడి గోపురమాయెరా హర హరా ఈపూట..
మది పరివర్తనము చెంది పాడింది నీ భక్తి పాట..

శంకరా.. నీ దివ్య ఓంకార నాదం..
సంగీత సాహిత్య కళలకది శబ్ధవేదం..
ప్రకృతి ఒడిలోన వినిపించు నిత్య నీ ప్రణవనాదం..
దుష్టగ్రహరాశులకది సింహా నాదం..

పుట్టించెదవు ఎందుకో…
కర్మలు చేయించెదవు మరెందుకో..
అర్ధమవవు శంకరా…నీ లీలలు
దిద్దుకొన తగవు…మా నుదుటి పై ఆ బ్రహ్మ రాసిన రాతలు…!!పుట్టించెదవు!!

ఏ నోము నోచాలి శంకరా…
మా కోర్కెలీడేరగా..
ఏ వ్రతము చేయాలి హర హరా…
ఈ జన్మ కడతేరగా…
శంభో హరా శంకరా…ఇదే వందనం గైకునుమురా.